جناب محسن کو قتیل سقیفہ کہنا چاہئے ، آپ نے اپنے وجود کے ذریعہ ظلم و ستم کی نشاندہی کی ، بالواسطہ طور سے آپ نے حضرت علیؑ کی ولایت و امامت کا اعلان فرمایا،تاریخ امامت و ولایت کے اولین شہید اور قتیل ۔
ولایت کے تحفظ کے سلسلے میں آپ کی آواز اولین آواز تھی، آپ کا جہاد اولین جہاد تھا اور ولایت امیر المومنین پر مرمٹنے والی پہلی شہیدہ تھیں ، فدک کے لئے آپ کا جہاد و احتجاج اس قدر عمیق اور ہمہ گیر تھا کہ باطل بھی کف افسوس مل کر اثبات حق پر مجبور ہوگیا ، انداز پیکار میں ایسی جامعیت تھی کہ آج بھی زبان زد خاص و عام ہے ۔
جناب محسن کی شہادت در اصل صدیقہ طاہرہ کی شہادت کا مقدمہ تھی ، اس عظیم مدافعہ ولایت نے اتنے بڑے بڑے صدمات کے باوجود بھی چپ چاپ بیٹھنے پر اکتفا نہیں کی بلکہ پے در پے کوششیں کرتی رہی تاکہ کسی طرح امیر المومنین کا حق خلافت انہیں واپس کردیاجائے اور بالآخر اسی راہ میں آپ نے اپنی جان بھی قربان کردی ۔
صدیقہ طاہرہ فاطمہ زہراء ( س) کی یہ سراسر نورانی اور معنوی زندگی ہر طرح کے آسمانی احترام و اکرام کی سزاوار ہے، وہ نگاہ خدا میں تمام عورتوں کا انتخاب ہیں ، انہوں نے اپنے کردار کی پاکیزگی سے عورتوں کو معراج عطا کی ، آپ کاتنہا وجود اس بات پر مکمل گواہ ہے کہ عورتیں بھی معنویت کے عظیم درجات حاصل کرسکتی ہیں اور ان مقامات تک پہنچ سکتی ہیں جہاں تک عام مردوں کی رسائی نہیں ہے ۔
ارباب نظر ! حضرت صدیقہؑ کی زندگی اور شخصیت و کردار کا مطالعہ ہر انسان کو مختلف مرحلوں اور شعبوں میں استقامت اور سخت ترین حالات و ماحول میں بھی صبر و ضبط کا درس دیتاہے ۔رسول خداؐ کی وفات کا رنج و غم اور بیماری کی تکلیف بھی آپ کو حق و حقانیت کے دفاع سے باز نہ رکھ سکی ، آپ نے پوری قوت و طاقت کے ساتھ حق کی مدد کی اور اپنی گفتگو، انداز و اطواراور جہد مسلسل کے ذریعہ حضرت علی ؑکی حقانیت کو ثابت کرنے کی کوشش کی ہے ۔۱۸/ برسوں پر مشتمل آپ کی زندگی میں وہ تمام چیزیں موجود ہیں جو ایک اچھی اور قابل قدر زندگی گزارنے کے لئے ضروری ہوتی ہیں ۔بس ضرورت اس بات کی ہے کہ ہم اس زندگی کو قریب سے محسوس کریں اور اسے اپنے دل و دماغ میں اتارنے کی کوشش کریں ۔
یہ خصوصی گوشہ اسی مقصد کے تحت قائم کیاگیاہے تاکہ صدیقہ طاہرہ (س) کی زندگی کے قابل قدر اور آفاقی کارناموں سے آج کا انسان آشنا ہو ، انہیں اپنی زندگی سنوارنے کا وسیلہ قرار دے اور شہزادی کی ولادت و شہادت کے مخصوص ایام میں ان مطالب سے بھرپور استفادہ کرسکے ؛ اس خصوصی گوشہ کو مفید بنانے کے لئے ہم نے اسے چار حصوں میں تقسیم کیاہے :
خدا کرے حضرت صدیقہ طاہرہ ؑ کی ملکوتی اور آسمانی بارگاہ میں ہماری یہ ناچیز کاوش شرف قبولیت سے ہمکنار ہو اور آپ اس سے خاطر خواہ استفادہ کرسکیں ۔ ہمیں اپنی خصوصی دعاؤں میں ضروریاد رکھئے گا۔
والسلام : شعور ولایت فاؤنڈیشن